പയ്യന്നൂർ: പയ്യന്നൂരിൽ ഇതര സംസ്ഥാന തൊഴിലാളിക്ക് നേരെ നടന്ന ലേബർ ക്യാംപിൽ അതിക്രൂരമായ മർദ്ദനം കണ്ണൂർ ജില്ലയെ ഞെട്ടിച്ചു. പയ്യന്നൂരിൽ ജോലി ചെയ്ത കൂലി ചോദിച്ച തൊഴിലാളിയെയാണ് ലേബർ ക്യാംപിൽ നിന്നും ക്രൂരമായി മർദ്ദിക്കുന്ന ചിത്രം സോഷ്യൽ മീഡിയയിൽ കഴിഞ്ഞ ദിവസം പ്രചരിച്ചത്. ഇതിനെ തുടർന്ന് പൊലിസ് അന്വേഷണമാരംഭിച്ചിട്ടുണ്ട്.
ദേശീയപാതാ നിർമ്മാണ കരാർ കമ്പനിയായ മേഘ കൺസ്ട്രക്ഷൻ കമ്പിനിയിലെ മഠത്തിൽ ലേബർ ക്യാംപിലെ എച്ച് ആർ മാനേജർ സാംബശിവ റാവു ക്രെയിൻ ഡ്രൈവർ ഉത്തരാഖണ്ഡിലെ ഭഗവാൻ ദാസിനെ മർദ്ദിക്കുന്ന ദൃശ്യമാണ് സോഷ്യൽ മീഡിയയിൽ പ്രചരിക്കുന്നത്. മെയ് 22 ന് വൈകുന്നേരം നാലു മണിക്കാണ് കേസിനാസ്പദമായ സംഭവം. മാസങ്ങളായി കൂലി കിട്ടാത്തതിനാൽ തൊഴിലാളി ഹൈദരബാദിലെ ഹെഡ് ഓഫീസിൽ വിളിച്ചു പരാതിപ്പെട്ടിരുന്നു.
ഹെഡ് ഓഫിസിൽ നിന്നും തൊഴിലാളികളുടെ കൂലി കൃത്യസമയത്ത് ലേബർ ക്യാംപിലേക്ക് അയച്ചു കൊടുത്തതിനാൽ എച്ച്.ആർ മാനേജരെ ഹെഡ് ഓഫിസിൽ നിന്നും വഴക്ക് പറഞ്ഞിരുന്നു. ഇതിന്റെ പ്രതികാരത്തിലാണ് ആക്രമണം നടത്തിയതെന്നാണ് തൊഴിലാളികൾ പറയുന്നത്. തന്നെ ക്രൂരമായി മർദ്ദിക്കുന്നത് കാഴ്‌ച്ചക്കാരായി നോക്കി നിൽക്കുന്ന സഹ തൊഴിലാളികളോട് ന നിങ്ങൾക്കും ഈ അനുഭവമുണ്ടാകുമെന്ന് ഭഗവാൻ ദാസ് വിളിച്ചു പറയുന്നുണ്ട്.
തൊഴിലാളികൾ നാട്ടുകാർക്ക് അയച്ചു കൊടുത്ത വീഡിയോയാണ് ചിലർ സോഷ്യൽ മീഡിയയിൽ പ്രചരിപ്പിച്ചത്. അതേസമയം ഇയാൾ നാട്ടുകാരായ ദമ്പതികളെ ശല്യം ചെയ്തുവെന്നും നാട്ടുകാർ പിടികൂടി ഏൽപ്പിച്ചതാണെന്നുമാണ് മാനേജരുടെ വിശദീകരണം. എന്നാൽ ഇതു പൊലിസ് വിശ്വസിച്ചിട്ടില്ല.
എന്തെങ്കിലും കുറ്റകൃത്യങ്ങൾ നടന്നാൽ നിയമം കൈയിലെടുക്കാൻ ആർക്കും അധികാരമില്ലെന്നാണ് ഈ കാര്യത്തിൽ പൊലീസിന്റെ നിലപാട്. സംഭവത്തിൽ പരാതി ഇതുവരെ ലഭിച്ചിട്ടില്ലെങ്കിലും പയ്യന്നൂർ പൊലിസ് സ്വമേധയാ അന്വേഷണം ആരംഭിച്ചിട്ടുണ്ട്.
