പാലക്കാട്: പാക്കിസ്ഥാനിലെ കറാച്ചി ജയിലിൽ മരിച്ച കപ്പൂർ സ്വദേശി സുൾഫിക്കറിന്റെ മൃതദേഹം അമൃത്സറിൽ വച്ച് ബന്ധുക്കൾ ഏറ്റുവാങ്ങും. എന്നാൽ മൃതദേഹം മറവുചെയ്യാൻ കേരളത്തിലേക്ക് കൊണ്ടുവരില്ല. അമൃത്സറിൽ വച്ചു തന്നെ മൃതദേഹം കബറടക്കാനാണ് നീക്കം.ഏത് സാഹചര്യത്തിലാണ് പാക് ജയിലിൽ മരിച്ചതെന്ന് ആർക്കും വ്യക്തമായി അറിയില്ല.
പഞ്ചാബ് അതിർത്തിയായ അട്ടാരിയിൽ കേന്ദ്ര ആഭ്യന്തര മന്ത്രാലയത്തിനു കീഴിലെ ഇന്ത്യൻ ഫോറിനേഴ്‌സ് റീജിയണൽ രജിസ്‌ട്രേഷൻ ഓഫീസ് അധികൃതർ പാക്കിസ്ഥാൻ അധികൃതരിൽ നിന്നും മൃതദേഹം ഏറ്റുവാങ്ങി അമൃത്സർ ജില്ലാ കളക്ടർക്ക് നൽകി. മരണവുമായി ബന്ധപെട്ട രേഖകൾ ഇന്ന് തന്നെ കൈമാറുമെന്ന് അധികൃതർ അറിയിച്ചു. സുൾഫിക്കറിന്റെ ബന്ധുക്കൾ നേരിട്ടെത്തി തിരിച്ചറിഞ്ഞ് സ്വീകരിക്കണമെന്നാണ് വ്യവസ്ഥയെങ്കിലും അമൃത്സർ വരെ എത്താൻ കഴിയാത്ത സ്ഥിതിയാണെന്ന് അറിയിച്ചതിനെ തുടർന്നാണ് അമൃത്സർ ജില്ലാ കളക്ടർ മൃതദേഹം ഏറ്റുവാങ്ങിയത്.
സുൾഫിക്കറിന്റെ ഗൾഫിലുള്ള സഹോദരൻ അമൃത്സറിൽ എത്തി മൃതദേഹം സ്വീകരിക്കും. ഇതിനുശേഷമാകും മൃതദേഹം കബറടക്കുക. കപ്പൂർ അബ്ദുൾ ഹമീദിന്റെ മകൻ സുൾഫിക്കർ (48) ആണ് മരിച്ചത്. സഹോദരന് ഐഎസ് ബന്ധമുണ്ടായിരുന്നുവെങ്കിൽ മൃതദേഹം സ്വീകരിക്കില്ലായിരുന്നുവെന്നും കുടുംബം നേരത്തെ വ്യക്തമാക്കിയിരുന്നു . പാക്കിസ്ഥാൻ ജയിലിൽ മരണപ്പെട്ട മത്സ്യത്തൊഴിലാളി എന്നാണ് പൊലീസിൽ നിന്ന് വിവരം ലഭിച്ചത്.
സ്പെഷ്യൽ ബ്രാഞ്ചയിൽ നിന്നും ഐബിയിൽ നിന്നും മുമ്പ് സുൾഫിക്കറിനെ അന്വേഷിച്ച് എത്തിയിരുന്നു. എൻ ഐ എ അന്വേഷിച്ച് വന്നിട്ടില്ലെന്നും അബ്ദുൾ ഹമീദ് പറഞ്ഞു. പാക്കിസ്ഥാൻ സർക്കാർ മത്സ്യത്തൊഴിലാളിയാണ് മരണപ്പെട്ടിുള്ളതെന്നാണ്. ഐബി അടക്കം അന്വേഷിച്ചിട്ടും വിവരങ്ങൾ ഒന്നും തന്നെ ലഭിച്ചിരുന്നില്ല. അതിർത്തി ലംഘിച്ച് മത്സ്യബന്ധനം നടത്തിയതിനാണ് പാക് സൈന്യം സുൽഫിക്കറിനെ അറസ്റ്റ് ചെയ്തത്. പിന്നീട് കോടതിയിൽ ഹാജരാക്കി കറാച്ചിയിലെ ജയിലിലാക്കുകയായിരുന്നു.
എന്നാണ് സുൽഫിക്കർ ജയിലിലായതെന്ന് സംബന്ധിച്ച് കുടംബത്തിനും അറിവില്ല. 2018ലാണ് അവസാനം നാട്ടിലെത്തിയിരുന്നത്. ഏറെ നാളായി അബുദാബിയിൽ ഡ്രൈവറായി ജോലി ചെയ്ത് വരികയായിരുന്ന സുൾഫിക്കറിനെ കുറിച്ച് വീട്ടുകാർക്ക് യാതൊരു വിവരവും ഇല്ലായിരുന്നു. പിന്നീടാണ് സുൾഫിക്കർ ഐഎസിൽ ചേർന്നുവെന്ന തരത്തിൽ വീട്ടിൽ വിവരം ലഭിക്കുന്നത്. നേരത്തെ, ഭാര്യയ്ക്കും മക്കൾക്കുമൊപ്പമാണ് സുൾഫിക്കർ വിദേശത്ത് ഉണ്ടായിരുന്നത്.
