Kerala

മഞ്ജു വാര്യരുടെ മൊഴി അതീവ നിര്‍ണായകം; പ്രത്യേക കോടതി 22ന് നടിയെ വിസ്തരിക്കും; വീഡിയോയില്‍ കൃത്രിമം ഉണ്ടെന്നും സ്ത്രീ ശബ്ദം നടിയുടേതല്ലെന്നുമുള്ള ദിലീപിന്റെ വാദങ്ങളൊന്നും വിലപ്പോയേക്കില്ല

കൊച്ചി: കൊച്ചിയില്‍ നടിയെ ആക്രമിച്ച കേസിന്റെ വിചാരണം പുരോഗമിക്കുമ്പോള്‍ കാര്യങ്ങള്‍ പ്രോസിക്യൂഷന്‍ ഉദ്ദേശിച്ച വിധത്തില്‍ തന്നെ മുന്നോട്ടു പോകുന്നു. ഇതുവരെ ഹാജരായി മൊഴി നല്‍കിയവരെല്ലാം കൃത്യമായി തന്നെ അവരുടെ മൊഴി രേഖപ്പെടുത്തുകയുണ്ടായി. എന്നാല്‍, വരും ദിവസങ്ങളില്‍ ഇതെന്താകും എന്ന ചോദ്യം ഉയരുന്നുണ്ട് താനും. കാരണം മഞ്ജു വാര്യര്‍ അടക്കമുള്ളവരെയാണ് ഇനി കോടതി വിസ്തരിക്കാനുള്ളത്.

ക്വട്ടേഷന്‍ പ്രകാരം നടിയുടെ അപകീര്‍ത്തികരമായ ദൃശ്യങ്ങള്‍ പകര്‍ത്താന്‍ തട്ടിക്കൊണ്ടു പോയി പീഡിപ്പിച്ചെന്ന കേസിലെ മുഖ്യപ്രതി സുനില്‍കുമാറിന്റെ (പള്‍സര്‍ സുനി) പരിചയക്കാരന്‍ ഇന്നലെ വിചാരണക്കോടതി മുന്‍പാകെ ദൃശ്യങ്ങള്‍ തിരിച്ചറിഞ്ഞു. കുറ്റകൃത്യത്തിനു ശേഷം പള്‍സര്‍ സുനി ആലപ്പുഴ അമ്പലപ്പുഴയിലെ പരിചയക്കാരന്റെ വീട്ടിലെത്തിയപ്പോഴാണ് ഈ ദൃശ്യങ്ങള്‍ സാക്ഷിയെ കാണിച്ചത്. നടി പൊലീസിനു പരാതി നല്‍കിയതോടെ അമ്പലപ്പുഴയില്‍ നിന്നു മുങ്ങിയ സുനില്‍, ദൃശ്യങ്ങള്‍ പകര്‍ത്തിയ മൊബൈല്‍ ഫോണും അതു പകര്‍ത്തിയ പെന്‍ഡ്രൈവും അഭിഭാഷകന്‍ വഴി അങ്കമാലി മജിസ്ട്രേട്ട് കോടതിയില്‍ സമര്‍പ്പിച്ചിരുന്നു.

കേസിലെ മുഖ്യതെളിവായ ദൃശ്യങ്ങള്‍ നിയമപ്രകാരം കോടതിയില്‍ എത്തിച്ച അഭിഭാഷകനെ 19നു പ്രോസിക്യൂഷന്‍ വിസ്തരിക്കും. ഇന്നലെ 3 സാക്ഷികളുടെ വിസ്താരം കോടതി പൂര്‍ത്തിയാക്കി. വൈകിട്ട് 6 വരെ വിസ്താരം നീണ്ടു. അതേസമയം നടിയെ തട്ടിക്കൊണ്ടുപോയി ആക്രമിച്ച് ദൃശൃങ്ങള്‍ പകര്‍ത്തിയ കേസില്‍ നടി മഞ്ജു വാര്യരെ പ്രത്യേക കോടതി വിസ്തരിക്കും. ഈ മാസം 22 നായിരിക്കും മഞ്ജു വാര്യരുടെ വിസ്താരം നടക്കുക. കേസിലെ പ്രധാന സാക്ഷികളിലൊരാളായ മഞ്ജുവിന്റെ മൊഴി ഏറെ നിര്‍ണായകമാണെന്നാണ് റിപ്പോര്‍ട്ടുകള്‍.

നേരത്തെ സാക്ഷികളായ നടി രമ്യ നമ്പീശന്‍, സഹോദരന്‍ രാഹുല്‍, സംവിധായകന്‍ ലാലിന്റെ ഡ്രൈവര്‍ എന്നിവരെ പ്രത്യേക കോടതി വിസ്തരിച്ചിരുന്നു. ആക്രമിച്ച് ദൃശ്യങ്ങള്‍ പകര്‍ത്തിയശേഷം നടിയെ സംവിധായകന്‍ ലാലിന്റെ വീടിനടുത്താണ് പ്രതികള്‍ വാഹനത്തില്‍നിന്ന് ഇറക്കിവിട്ടത്. ലാലിനെയാണ് നടി പീഡനവിവരം ആദ്യം അറിയിച്ചത്. 136 സാക്ഷികളെയാണ് ആദ്യഘട്ടത്തില്‍ കോടതി വിസ്തരിക്കുന്നത്. 35 ദിവസം കൊണ്ട് ആദ്യഘട്ട വിചാരണ പൂര്‍ത്തിയാക്കും. അതിനിടെ ദൃശ്യങ്ങളുടെ ആധികാരികത പരിശോധിച്ച് ചണ്ഡീഗഢിലെ സെന്‍ട്രല്‍ ഫോറന്‍സിക് ലാബ് (സി.എഫ്.എസ്.എല്‍.) തയാറാക്കിയ റിപ്പോര്‍ട്ട് ദിലീപിന്റെ പ്രതീക്ഷകള്‍ക്ക് തിരിച്ചടി ഏറ്റതായാണ് സൂചന.

ഓടുന്ന വാഹനത്തിലാണ് നടി ആക്രമിക്കപ്പെട്ടതെന്നും ദൃശ്യങ്ങള്‍ നിര്‍ത്തിയിട്ട വാഹനത്തിലേതാണെന്നുമായിരുന്നു ദിലീപിന്റെ പ്രധാനവാദം. വീഡിയോയില്‍ കൃത്രിമം ഉണ്ടെന്നും വീഡിയോയിലെ സ്ത്രീ ശബ്ദം നടിയുടേതല്ലെന്നുമായിരുന്നു മറ്റൊരു വാദം. ഇതൊന്നും ഫോറന്‍സിക് റിപ്പോര്‍ട്ട് ശരിവയ്ക്കുന്നില്ലെന്നാണ് സൂചന. മറ്റുതെളിവുകളുമായി ഒന്നാം സാക്ഷിയുടെ (നടി) ക്രോസ് വിസ്താരം വൈകാതെ നടത്താനാണു ദിലീപിന്റെ അഭിഭാഷകന്റെ തീരുമാനം. മുദ്രവച്ച കവറില്‍ കഴിഞ്ഞാഴ്ച വിചാരണക്കോടതിക്കു സമര്‍പ്പിച്ച റിപ്പോര്‍ട്ട് ദിലീപിനു കൈമാറിയിരുന്നു. ഇരയുടെ വിസ്താരത്തീയതി വിചാരണക്കോടതി ഇന്നു തീരുമാനിക്കും. ക്രോസ് വിസ്താരത്തിനു നടിക്കു പ്രത്യേകം സമന്‍സ് അയയ്ക്കും. കുറ്റകൃത്യത്തില്‍ നേരിട്ടു പങ്കാളികളായവരുടെ വിസ്താരമാണ് ഇപ്പോള്‍ നടക്കുന്നത്. ദിലീപിന്റെ പങ്കാളിത്തം വിശദീകരിക്കുന്ന സാക്ഷികളുടെ വിസ്താരം 25നു ശേഷമേ ഉണ്ടാകൂ. ഫോറന്‍സിക് റിപ്പോര്‍ട്ട് ലഭിച്ചശേഷമേ ദിലീപുമായി ബന്ധപ്പെട്ട ക്രോസ് വിസ്താരം ആരംഭിക്കാവൂ എന്നു സുപ്രീം കോടതി നിര്‍ദ്ദേശിച്ചിരുന്നു. നടിയുടെ പ്രോസിക്യൂഷന്‍ വിസ്താരം കഴിഞ്ഞ 30ന് ആരംഭിച്ചിരുന്നു.

 

Show More

മറുനാടന്‍ ടിവി

മറുനാടന്‍ ടിവി

Related Articles

Close